ചവയ്ക്കുന്ന ശബ്ദം സഹിക്കാൻ വയ്യേ? കുഴപ്പം നിങ്ങളുടെ ചെവിക്കല്ല

ചില പ്രത്യേക ശബ്ദങ്ങൾ കേൾക്കുമ്പോൾ ശക്തമായ ദേഷ്യമോ അസ്വസ്ഥതയോ അനുഭവപ്പെടുന്ന മിസോഫോണിയ എന്ന അവസ്ഥയുള്ളവർക്ക്, ശബ്ദം ഏത് ദിശയിൽ നിന്നാണ് വരുന്നതെന്ന് കൃത്യമായി തിരിച്ചറിയാൻ ബുദ്ധിമുട്ട് ഉണ്ടാകാമെന്ന് പുതിയ പഠനം വ്യക്തമാക്കുന്നു. ഭക്ഷണം ചവയ്ക്കുന്ന ശബ്ദം, മൂക്ക് വലിക്കുന്ന ശബ്ദം, പേന കൊട്ടുന്ന ശബ്ദം തുടങ്ങിയ സാധാരണ ശബ്ദങ്ങളാണ് മിസോഫോണിയ ഉള്ളവരിൽ തീവ്രമായ പ്രതികരണം ഉണ്ടാക്കുന്നത്. എന്നാൽ ഇവർക്ക് സാധാരണയായി കേൾവിക്കുറവ് ഉണ്ടാകില്ല; ഓഡിയോഗ്രാം പരിശോധനയും സാധാരണ നിലയിലായിരിക്കും. കേൾവി സാധാരണ നിലയിലുള്ള 40 പേരിൽ നടത്തിയ പഠനത്തിൽ, മിസോഫോണിയ ഉള്ളവർക്ക് ശബ്ദത്തിന്റെ ദിശ കൃത്യമായി തിരിച്ചറിയുന്നതിൽ കൂടുതൽ ബുദ്ധിമുട്ട് അനുഭവപ്പെട്ടതായി കണ്ടെത്തി. പ്രത്യേകിച്ച് വലത്തും ഇടത്തുമായി ചെരിഞ്ഞ ഭാഗങ്ങളിൽ നിന്ന് വരുന്ന ശബ്ദങ്ങളുടെ ദിശ തിരിച്ചറിയുന്നതിലാണ് കൂടുതൽ പിഴവുകൾ ഉണ്ടായത്. മിസോഫോണിയയുടെ തീവ്രത കൂടുന്നതിനനുസരിച്ച് ഈ ബുദ്ധിമുട്ടും വർധിക്കുന്നതായും പഠനം വ്യക്തമാക്കുന്നു. ഈ കണ്ടെത്തലുകൾ മിസോഫോണിയ വെറും "ശബ്ദം ഇഷ്ടപ്പെടാത്ത സ്വഭാവം" മാത്രമല്ലെന്നും, തലച്ചോറ് ശബ്ദങ്ങളെ സംസ്കരിക്കുന്ന രീതിയുമായി ബന്ധപ്പെട്ട ഒരു ന്യൂറോളജിക്കൽ അവസ്ഥയായിരിക്കാമെന്നും സൂചിപ്പിക്കുന്നു.